Харадинај: Нема да има мир на Балканот се додека Србија не ги признае своите злосторства

Косовскиот премиер Рамуш Харадинај порача денеска дека на Балканот нема да има мир се додека Србија не ги признае злосторствата кои ги изврши во регионот во војните од 90-тите години.

Харадинај пораката ја упати од Голема Круша, на одбележувањето на 20-годишнината од масакрот во тоа село и во Мала Круша во близина на градот Ораховец, каде што од 25 до 27 март 1999 година српските сили убија 243 мажи и момчиња, оставајќи 140 вдовици и 502 сирачиња, како и запалија 893 приватни и јавни објекти. Освен тоа, 64 Албанци од таа област и натаму се водат за исчезнати, а вкупниот број  исчезнати во цело Косово, Албанци и Срби, е околу 1.700.

Косовскиот премиер на комеморацијата во Голема Круша рече дека се несфатливи изјавите со кои српските челници ја негираат вистината за воените злосторства.

– Во 1999 година беше праведна одлуката на НАТО да ја запре косовската трагедија (…) Ги слушам српските политичари како ги негираат злосторствата и нашата болка. Ние имаме десетици места каде што се убиени недолжни цивили, од многу националности и вери, изјави Харадинај.

Тој нагласи дека е „несфатливо Србија да бара нешто во возврат за признавањето на независноста на Косово“.

– Како е можно да се негира Круша, Сува Река…? Како е можно (Александар) Вучиќ, (Ана) Брнабиќ и (Ивица) Дачиќ да ја негираат вистината? Како мислат да му донесат мир на Балканот? Ние и со овие исчезнати одевме на дијалог. Како е можно тие да бараат од Косово да исполни некакви услови за да одат на дијалог?, рече Харадинај.