“Mbrëmë patëm takim me deputetët, biseduam për thelbin e ligjit. Bisedimet vazhdojnë. besoj se gjatë fundjavës më së voni do të vazhdojë takimi mes ministres së Drejtësisë së bashku me ekipin e saj nga Qeveria me partinë më të madhe opozitare VMRO-DPMNE. Besoj se këtu do të kemi hap të konsiderueshëm përpara, në mënyrë që më tutje t’i presim edhe hapat e tjerë pozitivë edhe me grupin e ri parlamentar të VMRO-DPMNE-së, përkatësisht tetë deputetët, e më tej me Aleancën për shqiptarët, por edhe me Lëvizjen BESA dhe me përfaqësuesit e tjerë në Parlament”, deklaroi Zaev duke u përgjigjur në pyetjen e gazetarëve gjatë vizitës së sotme në Ohër.
Pushteti dhe opozita dje mbajtën takim për ligjin për prokurorinë publike në Ministrinë e Drejtësisë, por nuk arritën marrëveshje.
Mbeten dallimet kyçe rreth statusit të PSP-së dhe përdorimit të audio materialeve, por siç deklaruan pjesëmarrësit pas takimit të mbrëmshëm, ekziston disponimi për vazhdimin e bisedimeve.
Zaev dhe Deskoska dje patën takim edhe me dy partitë opozitare shqiptare – Aleancën për shqiptarët dhe Lëvizjen BESA, të cilat dhanë mbështetje për ekzistimin e PSP-së si organ i posaçëm në suaza të prokurorisë.
Pushteti shpreson se do të sigurohet shumica e nevojshme prej dy të tretave dhe ligji do të sillet para zgjedhjeve. Ai është edhe një prej kushteve për hapje të negociatave me BE-në në qershor.